BATZARREKO KOORDINATZAILEAREN KUDEAKETA TXOSTENA 2017-2020
2020ko irailean 14 pertsonak osatzen dute koordinatzailea, 7 emakumek eta 7 gizonek.
2017tik gaurdaino lau dimisio izan dira, bi koordinakundeak egin edo erabakitakoarekin desadostasunak izan dituztelako eta beste bi arrazoi pertsonalengatik. Era berean, lau kide berri sartu dira.
Koordinakundea hamabost egunean behin biltzen da, hala ere, jarduera handiko garaietan astean behin egiten dira bilerak (hauteskunde garaietan, batzarraren prestakuntzan); batez beste 9 pertsona biltzen dira.
Bilera guztietan gai-zerrenda eta akta gordetzen dira. Dokumentazio hori guztia Koordinatzailea osatzen dugun pertsonek partekatutako gune birtual batean dago, eta edozein afiliatuk eska dezake.
Batzarre Koordinakundeak aukeratu duen bozeramailetza partekatuaren formatua (Olga Risueño, Iñigo Rudi eta Patricia Abad) egokia dela uste dugu. Horri esker, lana hobeto banatu da, eta uste dugu, ahal den neurrian, hobe dela taldearen ordezkaritza soilik pertsona baten esku edo Iruñearen esku ez uztea.
Etapa berri honen hasieran hiru helburu nagusi ezarri genituen Koordinakundean: lehenik, taldearen barne-bizitza sendotzea eta antolakuntza aspektuak hobetzea; bigarrenik, gure presentzia publikoa eta mediatikoa indartzea; eta, azkenik, baina ez garrantzi gutxiagokoa, aurreikusitako hauteskunde bakoitzean gure hauteskunde-itunak definitzea.
1. KOLEKTIBOAREN ANTOLAKETA ETA BARNE-BIZITZA.
Antolaketari dagokionez, Iruñeko Teresa Burgui, Rakel del Pozo eta Iñigo Rudik, Tuterako Olga Rilorekin batera, osatu zuten egoitza-talde berria izan zen gairik aipagarriena. Gaur egun Iruñeko egoitzan Rakel del Pozo eta Iñigo Rudi daude, eta Tuteran Olga Risueño lanaldi partzialean. Kapitulu honetan, nabarmentzekoa da 2018an Tuterako Batzarreren egoitza ireki zela. Horren bidez, Erriberako lana sustatu, eta elkartzeko, eztabaidatzeko eta ikusarazteko gune bat sortu nahi izan zen.
Egoitzako langileak edukitzeak lanaren kudeaketan eta antolaketan hobekuntzak egiteko aukera eman du (afiliazioaren datuak eguneratzeko datu-basea, komunikazioak bidaltzea, kuotak kudeatzea, datuak babesteko legezko baldintzak betetzea, egoitzaren goizeko eta arratsaldeko ordutegia ziurtatzea…).
Batzarreko koordinakundean oinarritu da kolektiboaren politika eta antolakuntzako lan gehiena. Bere zereginen artean, honako hauek nabarmendu behar dira: Kontseilu Politikoaren gai-zerrendak prestatzea, errealitate politiko-sozialaren jarraipena egitea, komunikabideentzako komunikazioak prestatzea eta presentzia publikoari eustea, barne-eskaerei erantzutea, alderdiekiko harremanari eustea, Izquierda-Ezkerrak egiten dituen eskakizunei erantzutea, sare sozialetako eguneroko bizitzari eustea, 2. Batzar Orokorreko planak eta testuak prestatzea, barne-taldeak antolatzea, eta beste hainbat jarduera.
Organo hori asko berritu zen 2017. urteko Batzar Nagusian, eta, ondorioz, belaunaldi berriko pertsonak ez ezik, emakume gehiago ere sartu dira organo horretan. Esperientziaren balantze positiboa egiten dugu, alderdi batzuetan hobetzeko gauzak egon arren.
Kontseilu Politikoa bi aldiz bildu zen 2017an (ekainetik aurrera, koordinatzaile berria hautatu zen egunetik aurrera), hiru aldiz 2018an eta lau aldiz 2019an. 2020an behin bildu da (otsailean), eta Batzarra baino lehen beste bi bilera zehaztu ditugu egutegian. 20-50 lagun artean bertaratu dira. Bertan, gai hauek landu dira, besteak beste: ezkerrekin egindako akordioen martxa, hauteskunde erabakiak eta balantzeak, Izquierda-Ezkerraren bilakaera, afiliazioari egindako kontsultak onartzea, Batzar Orokorra prestatzea, etab. Kontseilu Politikoaren espazioak aukera eman du kolektiboaren parte-hartzea zabaltzeko, intereseko gaiei buruz eztabaidatzeko eta erabaki garrantzitsuenetan kolektiboaren parte-hartzea eta protagonismoa bultzatzeko.
Euskara, feminismoak eta gazteak lan-taldeak sortu dira Batzarren, eta baita zinegotzien koordinakunde bat ere. Emaitzak anitzak dira, eta ez dira beti lortu aurreikusitako helburuak; hala ere, neurri batean, hausnarketa kolektiboa eta gai espezifikoetan sakontzea ahalbidetu digu.
Koordinakundea hainbat unetan bildu da tokiko batzarrekin, koordinakundearen beraren ekimenez edo haiek hala eskatuta. Denboraldi honetan batzar aktiboak izan ditugu Antsoainen, Burlatan, Berriozarren, Barañainen, Atarrabian, Milagron, Tuteran…
Gure afiliazioaren bolumena mantendu egin da. Jakin badakigu kolektibo horretan parte hartzen duten pertsona gehienak “helduak” direla, eta argi daukagu belaunaldiz belaunaldi Batzarre berritu egin behar dela. Emaitzak urrun daude oraindik ere, eta, beraz, gai nagusia kolektibo osoaren hausnarketa eta kezka izan beharko da.
Afiliazioarekiko komunikazioa eta informazioa ere azpimarratzekoa da, posta elektronikoaren eta WhatsApp talde baten bidez egiten da (une honetan 203 pertsona daude), eta informazioa emateko barne-kanal gisa erabiltzen da; une jakin batzuetan, posta bidezko gutunak erabiltzen dira komunikazio hurbilago gisa.
Nahiz eta teknologia berrien erabileraren prozesua lehendik datorren, Covid-19ak horien ezarpena eta garapena azkartu ditu, eta erakunde, enpresa, ikastetxe, kolektibo eta abarren antolaketa-sistemen teknikak aldatu ditu, non Internetek eta komunikazio digitalak garrantzi berezia hartzen duten formatu berriekin.
Batzarre aspaldi ari da arlo horretan aurrera egiten, baina egoera berriaren ondorioz, gure kolektiboak ere bultzatu behar izan du barne-komunikazioa (bideo-konferentzia bidezko bilerak txertatuz, besteak beste) eta kanpoko-proiekzioa (bideo-hitzaldiak, bideo-eztabaidak…). Horretarako, baliabide egokiak eskuratu ditugu. Gai horietan atzerago dauden kolektiboko eta inguruko jendea animarazi behar dugu, haietara gogoz sar dadin, eta elkarren arteko komunikazioa hobetzeko beharrezkoa den guztia eman.
2. HAUTESKUNDE ZITAK.
1. Batzarretik hona 5 hauteskunde zita izan ditugu (2 orokor, Europakoak, autonomikoak eta udaletakoak). Aldez aurretik kideei galdetuta Ahal dugu eta Ezker Batuarekin batera aurkeztu ginen orokorretan eta Europakoetan; Ezker Batuarekin batera autonomikoetan Izquierda Ezkerra koalizioan; eta hainbat formuletan udaletakoetan (EBrekin batera udal gehienetan eta EB eta Ahal Dugurekin beste hainbatetan).
Kideei aldez aurretik galdetzea formula gero eta ohikoagoa ari da izaten eta tresna eraginkorra izan daitekeela ikusi dugu. Erabaki garrantzitsuak hartzeko orduan hala jokatu dugu, esate baterako, hauteskundeetara nola joan erabakitzeko 5 zitetatik lautan baliatu dugu formula hau, eta baita gai garrantzitsuen inguruan adierazpen publikoak egin behar izan ditugunean ere, hala nola, zerrenda bakarra, MaríaChiviteren Nafarroako Gobernuko Lehendakaritzarako inbestidura eta legegintzaldi honetako Gobernuaren Akordio Programatikoa.
Hauteskunde zita hauek kanpainak egin behar izatea suposatu dute, horrek dakarrenarekin: materialak sortzea, ekimenak antolatzea, agenda… negoziazio, koordinazio eta halako bilerez gain. Honek guztiak dedikazio handia eskatu die Koordinatzaileari eta egoitza-taldeari. Hauteskunde zita horietakoren batean, kanpainaren pisu gehiena Batzarrek hartu behar izan du bere gain.
3. PRESENTZIA PUBLIKO ETA MEDIATIKOA.
Azken hauteskunde autonomiko eta udal-hauteskundeen ostean gure presentzia nabarmen ahuldu da instituzioetan. Aurreko legegintzaldian Nafarroako Parlamentuan lortu zen bigarren postua ez da lortu eta Udaletan genuen presentziak ere nabarmen egin du behera.
Leku askotan ez dugu emaitza onik lortu, ezta aurreko legegintzaldietan presentzia iraunkorra lortzen ari ginen hainbat lekutan ere. Tutera izan da salbuespen nabarmenena, Izquierda Ezkerrak 7 zinegotzi lortu baititu, Batzarreko 5 haien arten. Gertakari garrantzitsua da eta etorkizunean eginen ditugun planteamenduen inguruan hausnarketa egiteko aukera eman diezaguke.
Denbora tarte honetan 4 hitzaldi antolatu dira medioetan eragina duten hainbat aditurekin interes handiko gaien inguruan. 3 urte hauetan 200dik gora adierazpen bidali ditugu medioetara, nola iritzi artikuluak hala prentsa oharrak. Modu berean, hainbat prentsaurreko antolatu dira, bai Batzarrek deituak, bai Izquierda Ezkerrak deituak, aldizkako hainbat irrati hizketalditan parte hartu dugu, Ezkerretik Berrituzen igorpenak mantendu ditugu eta aldizkari digitala berreskuratu dugu. Azkenik, web-orri berritua dugu, egunez-egun eguneratzen duguna, Facebook eta Twitter bezalako sare sozialetan ere presentzia dugu, eta bereziki azpimarratu nahiko genuke Enekorekin batera sare sozialetan egiten dugun lana, deialdiekin bat egiteko, Batzarrerentzat garrantzi handia duten egunei begira kanpainak antolatzeko, Bardeetara egin genuen martxa bezalako geure ekimen propioak zabaltzeko, etab.
Batzarreko Koordinakundea, 2020